讀者投稿《貪錢ex奶奶篇》
我已經離咗婚起碼十年, 除咗頂唔順果個不事生產嘅前夫之外, 仲有就係佢嘅見錢開眼嘅呀媽嘞!!
一直以黎, 大仔同細女都係我個ex 99湊。
記得我個大仔幾個月大果時, 個ex 99 會擺佢喺佢大脾照打牌, 我係無得出聲, 好彩我個仔瞓得!!
後來, ex 99嫌我地俾得少, 一個月通知話唔湊大仔, 搞到我要即刻喺三月咁嘅時候搵間全日制幼稚園俾大仔讀, 第一日就由朝早八點返到夜晚七點, 喊足一個星期, 我心痛都無辦法!!
點知ex 99 做咗幾年, 又搞到個膝頭傷哂, 咁又幫我湊返個仔, 後來細女出世, 佢又話幫我地湊!!
果時, 我地每個月俾五千蚊個 ex 99 同 ex 62, 因為我地一家會喺佢屋企食埋晚飯先返屋企, 所以另外又會俾二千蚊伙食, 果時差唔多二十年前架啦, 其實都唔少錢, 但係我果個ex 99 同我講, ex 62 剩係湊下返學放學就有二千五蚊, 佢又煮飯又湊孫, 又係得二千五喎; 果時我幾想講七千蚊已經佔咗我地家庭總收入差唔多三分一, 我地仲要供樓, 啲細路又讀緊書, 仲想點呀? 當然心諗同口講係兩回事, 我只係同個貪錢 ex 99講唔好意思, 暫時我地只可以俾到咁多!!
如是者到我細女都兩歲, 我諗咁都唔係辦法, 所以暗地開始搵外傭, 同搵屋搬, 當然我同個前夫講幫個女搵到間好嘅幼稚園, 咁岩我父母又有間屋喺附近, 所以搬過去咁啦....
點知咁岩又有事發生, 稅局寄信黎話我地申報有供養我ex 99 同ex 62, 因為我前夫不嬲都係攞緊佢地兩老嘅免稅額; 咁我個ex 62係有攞傷殘津貼, 我咪打電話去稅局講我地係有供養兩老; 點知稅局同我講兩老係攞緊綜援!! 果下野我即刻火起!!
我打電話問ex 99, 原來佢整親膝頭入醫院果時, 社工教佢申請綜援, 但係又唔同我講!!! 我果刻仲要忍住度氣, 同佢講"其實你同我講聲, 我地可以唔攞你兩個免稅額喎!!" 之後仲幫佢問人可以點做, 教埋佢同社署講咩都唔記得!! 點知轉個頭自己就認哂!! 最後咁緊係要俾人扣錢啦!! 唔駛佢嘔返之前果啲已經要偷笑啦!!
後來我先知, ex 99 仲幫 ex 62轉埋攞綜援, 一個月兩老有成萬蚊, 加埋我地俾果七千蚊, 係好駛過我地一家人囉!!
點知呢件事仲有下集, 我原本諗住同佢講唔駛佢幫我湊細路, 打電話約佢一齊去探果時入咗醫院嘅ex 62, 仲叫佢搵埋佢個女, 即係我個ex 姑仔, 一齊黎!! 喺醫院見到面, 呀ex 姑仔就開口先, 話: "你知啦, 依家呀媽嘅綜援俾人扣咗錢, 想你果邊補返條數咁囉~~" 我即刻講: " 呀, 其實咁嘅, 呀女幾個月之後就返幼稚園, 我地會搬, 同埋請咗個工人, 下個月開始唔駛麻煩你嘞, 不過我地會每個月俾返二千蚊你地兩老買野食, 唔該哂!!"
講完, 我就走, 果刻, 我慶幸我一早有安排, 同埋都有一絲心涼!!
後尾, ex 62過咗身, ex 99第一件事係叫我攞 ex 62 張提款卡, 禁啲錢出黎; 因為 ex 62 係攞綜援, 所以所有後事係有指定機構去搞同實報實消; 呀ex 姑仔就叫哂三兄弟同埋佢一齊開個家庭會議, ex 姑仔話每家夾二千零蚊, 咁我問 ex 62 啲後事駛費政府俾哂, 其實仲有咩要俾錢? ex 姑仔話, 留俾在生果個用都得架!! 果刻我有啲反感, 心諗ex 99已經即刻攞哂 ex 62戶口啲錢, 雖然都無一萬, 但係唔駛去得咁盡嘛!!
我同ex 姑仔講要問下前夫, 當然我已經預計到我前夫個答案係佢無錢啦!!
我同ex 99 講佢個仔話無錢夾, 不過兩個孫希望可以出錢買個骨灰"un"同塊碑俾佢地呀爺. 最後個骨灰"un"同塊碑俾係用咗三千幾四千蚊!! 我心諗, 你吹得我脹咩??
#退一步海闊天高
#我的極品四大長老
Search